The God of Small Things (1997)

Коммунизм, ангиар ялгаварлах үзэл, шашин шүтлэг хийгээд соёлын харшилдаанзэрэг нийгмийн олон үзэгдлийг дэвсгэр болгон ихэр ах дүүсийн хувь заяаг хүүрнэх бүтээл. Бүүкерийн шагнал хүртсэн уг романд 1960-1990-ээд оны өөрчлөлт шинэчлэлийн үеийг өгүүлэх бөгөөд зохиолчийнх нь бичсэнээр “Өөрчлөлт гэдэг нэг хэрэг. Харин түүнийг хүлээж авна гэдэг огт өөр хэрэг” билээ.

A Fine Balance (1995)

1970 оны Онц байдлын үеийн Энэтхэг орон, тухайн цагийн Ерөнхий сайдын тухай ном.Гэвч уг зохиолд Индира Гандийн нэрийг огт дурдалгүйгээр, гол дүрийн дөрвөн баатраар дамжуулан улс төрийн үйл явдал, уур амьсгалыг харуулна. 

The Wind-Up Bird Chronicle (1994) 

Торү Окадагийн муур Токио хотод алга болсноор зохиол эхэлнэ. Тэрбээр бодит байдалд ч, зүүдэндээ ч эгч дүү сэтгэл зүйчидтэй уулздаг болно.Энэ зохиол хэдий ээдрээтэй, төөрдөг байшин мэт өгүүлэмжтэй ч халуун дулаан уур амьсгал, хүнлэг аясаа ер алдахгүй. 

Midnight's Children (1980)

Энэ номд шидэт реализм шинэ Энэтхэг оронтой учран золгожээ. Зохиолын гол дүр Салим Синай Энэтхэг орон тусгаар тогтносон өдөр мэндэлсэн бөгөөд гоц авьяастан юм. 

Heat and Dust (1975)

Энэтхэгээр аялах англи бүсгүйн тухай өгүүлэх энэ номд 1920-иод оны Британийн Раж буюу Жагарын орны аж байдлыг харуулна. Номын зохиолч Рүт Правер Жабавала нь Бүүкерийн шагнал болон Оскарын алтан баримал хоёрыг хоёуланг нь хүртсэн одоогоор цорын ганц хүн юм.

Spring Snow (1969-71)

Мишима Юкио 1970 оны арваннэгдүгээр сард амиа егүүтгэн хорвоогоос явсан билээ. Харин ийм шийдвэр гаргахаасаа өмнөнэгэн дөрвөлсөн романыг хэвлэн нийтлэгч рүүгээ илгээсэн нь энэхүү “Хаврын цас” бүтээл юм. Шинээр төвхнөсөн XX зууны Япон орныг дүрслэх уг номыг туульсын зохиол ч гэж тодорхойлж болно. 

All About H.Hatterr (1948)

Англи худалдаачин, малайз эмэгтэйн дундаас төрж Энэтхэгт өсөж өндийсөн нэгэн хүүгийн ухаарал, гэгээрлийнэрэл, адал сонин амьдралыг хүүрнэх энэхүү номыг Английн нэрт зохиолч Антони Бёржесс “уран нарийн шаглаатай, сэтгэл татам орооцолдоон” хэмээн тодорхойлсон байна. 

Rashomon (1915)

150 гаруй богино өгүүлэг бичиж, Япон өгүүллэгийн эцэг гэгдсэн Акүтагава Рюүносүкэ ердөө 13 хуудас бүхий “Ширэнгэд” зохиолоо анх 1915 онд хэвлүүлсэн нь хожим Күросавагийн “Рашёмон” киногоор дамжин олон орноо танигдсан юм. Заримдаа тууж, өгүүллэг гэгддэг ч өгүүлэмж, агуулгын хувьд энэ зохиол аргагүй “том” бүтээл билээ.

The Dream of the Red Chamber (1791)

400 гаруй дүртэй энэ зохиол сонгодог хятад хэлний гайхамшгийг мэдрүүлдэг гэдэг. Зохиолд сурвалжит нэгэн гэр бүлээс салбарласан хоёр өрх айл, тэдгээрийн гишүүдийн эмгэнэлт хайрын түүх, хүнлэг сэтгэлийн тухай өгүүлнэ.

The Thousand Nights and One Night (англи хэлнээ анх 1706 онд хэвлэгдсэн)

Цаазын ял сонссон Шахерезада бүсгүй үхлээ “хойшлуулахаар” мянган шөнө үлгэр хүүрнэнэ. Гэмт хэрэг, айдас хүйдэс, уран сэтгэмж, хайр дурлал гээд юм бүхнийг сүлсэн энэ зохиол Толстой, Дюма, Прүст нарын олон “том” зохиолчид нөлөөлсөн байдаг.