Арав.мн

Аз жаргалаа алтаар арилжсан Катар

Аз жаргалаа алтаар арилжсан Катар

Олон зуун жил сувд экспортлогч орон байсныг нь эс тооцвол эргэлдэх хөрөнгө гэх юмгүй, Булангийн орнууд дундаа хамгийн ядуу нь байсан Катар ердөө хагас зуун жилийн дотор бүс нутгийнхаа төдийгүй дэлхийн хамгийн чинээлэг улсын нэг болжээ. “Forbes” сэтгүүлээс гаргасан саяхны судалгаагаар тус улс нэг хүнд ногдох ДНБ-ий хэмжээгээр дэлхийд нэгд орж, иргэн бүртээ жил бүр дунджаар 100 мянган ам.доллар хүртээдгээрээ хамгийн чинээлэг улсаар тодроод байна. 150-иад жил Аль-Танигийн удмынхны мэдэлд буй энэ нутаг 1971 он хүртэл Британийн эзэмшил байлаа. Харин Бахрейний жишгийг дагаж, тусгаар тогтнолоо зарлахдаа Арабын Нэгдсэн Эмиратын бүрэлдэхүүнд багтахаас татгалзсан түүхтэй. 

1940-өөд оны сүүлчээр газар нутгийнх нь ихэнх хэсгээс газрын тос илэрсэн бөгөөд нефтиэс гадна байгалийн хийн асар их нөөцтэй гэдэг. Дэлхийн хэмжээнд тогтоогдсон байгалийн хийн бүх нөөцийн 15 хувь нь Катарын нутагт бий. 1995 онд хаан эцгээ суудлаас нь буулгаж, засгийн эрхэнд гарсан Хамад бин Халифагийн хаанчлал дор Катар орон өөрчлөгдөн, либерал замыг сонгожээ. 

Улс төрийн энэхүү шинэчлэл газрын тос, байгалийн хийн арвин нөөцийг нь эдийн засгийн эргэлтэд оруулж, улсын сан хөмрөгийг баяжуулсаар байна. Гэвч бэл бэнчинтэй боллоо гээд катарчууд сэтгэл хангалуун амьдарч байна уу? 

Катарын их сургуулийн багш, социологийн ухааны доктор Кальтам Аль-Ганимийн хэлснээр катарчууд хотжихийн хэрээр гэр бүлсэг байдлаа алдаж, эд агуурс руу хошуурч, материаллаг соёлд нэрвэгдээд байгаа гэнэ. “Энэ нь олон улсад байдаг л зүйл. Катар юугаараа өөр вэ” гэж та гайхаж магад. 

Дэлхийн аз жаргалын индекст чинээлэг орнуудаас Катар улс л хамгийн доогуур байр эзэлдэг. Катарчууд нийгмийн халамж, үйлчилгээ, амар тайван байдал, төр засагтаа итгэх итгэл зэргээрээ дээгүүрт орох ч байгаль орчин сүйдсэнд, нийгэм нь дэндүү хурдан өөрчлөгдсөнд сэтгэл дундуур явдаг байна. Доха хотын хаана ч энэ байдлыг мэдэрч болно. Хотын энд тэндгүй хэзээ дуусах нь тодорхойгүй зам засвар, барилгын ажил үргэлжлэх бөгөөд үүнээс болж замын түгжрэл ихсэж, хотын иргэд байнга л яарч, бухимдах болжээ. 

Орон нутгийн телевизийн мэдээлснээр гэрлэлтээ бүртгүүлж буй катарчуудын дунджаар 40 хувь нь салж, нийт хүн амын гуравны хоёр нь хэт таргалаад байна. Катарчууд төрөөсөө боловсрол, эрүүл мэндийн төлбөргүй үйлчилгээ, баталгаат ажлын байр, хямд сууц, тэр бүү хэл үнэгүй ус, цахилгаанаар хангагддаг ч энэ элбэг дэлбэг байдал нь эргээд олон саад бэрхшээл үүсгэж буй гэнэ. “Сургууль төгсөгчид дор хаяж 20 ажлын санал хүлээж авдаг. Хүн бүр зөв сонголт хийх хүндхэн сорилттой тулгарч, нийгмийн сэтгэл зүйд дарамт үүсэж байна” гэж Катар дахь Америкийн их сургуулийн нийгэм судлаач хэлэв. 

Тус улсын хөдөлмөрийн насныхны долооны нэг хувь нь л Катарын уугуул иргэд бөгөөд хамгийн таатай ажлын байруудаа катарчууд гаднынханд алдах нь нэмэгдсээр байна. Энэ нь ажилдаа сэтгэл хангалуун бус, хэдий их мөнгө олдог ч ямар нэг зүйлээ бусдад булаалгаж, хүний нутагт байгаа мэт мэдрэмж тээж явдаг хүний тоог өсгөжээ. Катарчууд хөгжилд хэт яарч, нийгмийн энэ мэт үнэт өвөө, цаашилбал гэр бүлийн үнэ цэнийг ч алдаж эхэлсэн гэнэ. Өдгөө катар хүүхдүүдийн олонх нь Филиппин, Индонез, Балбаас ирсэн асрагчдын халамжинд хүмүүжиж, эцэг эхээсээ тусдаа төлөвшин, зарим нь бүр тусдаа сууцанд амьдарч байна. 

Доха хотын иргэн, 60 эргэм настай Умм Халаф гэдэг эмэгтэй залуу байх үед нь амьдрал энгийн, сайхан байсан тухай дурсан “Бид ураг саднаараа нийлж, айлсан амьдардаг байлаа. Тэр үед зовох юмгүй, бүх зүйл ойлгомжтой, энгийн байжээ” хэмээн ярих аж. 

Доха хотын баруунтаа орших Умм Аль-Афай буюу Могойн газар нэртэй нутагт байх сангийн аж ахуйн эзэн Али Аль-Жехани мөн тэр цагийг дурсаж “Өмнө нь гараа хөдөлгөсөн хүмүүс л мөнгөтэй байсан бол одоо ажилласан, ажиллаагүй ялгаагүй бүгд л хөрөнгөтэй болж. Засгийн газар тусалж байгаа нь энэ гээд иргэддээ амьдралын амт шимтийг мэдрэх боломж олгохгүй байна. Бүх зүйл дэндүү хурдан өөрчлөгдөж байна. Бид алт, мөнгөтэй болох гээд аз жаргалаа өөрсдийн гараар үгүй хийсэн” гэж ярив. 

Катарын нийгмийн хурдацтай өөрчлөлт, бүтээн байгуулалтын төлөөх улайрал 2022 оны хөлбөмбөгийн ДАШТ-ийг тус улс зохион байгуулахаар төлөвлөж буйтай холбоотойгоор бүр ч эрчтэй болжээ. Катарчууд энэ наадмыг зохион байгуулахад 200 тэрбум ам.доллар зарцуулна гэж ам гараад байгаа. Үүнийгээ ч хотойхгүй биелүүлнэ. Гэвч катарчуудын олонх нь ДАШТ-ээс болж өдөр тутмын амьдралынх нь хэмнэл бүр ч алдагдаж, дарамт үүсэх вий гэж эмээж байна. 

“Катарчууд айж байгаа. Дэлхий нийт гэнэтхэн л биднийг сонирхож эхэллээ. Бусад оронтой харьцуулахад бид хаалттай нийгэмд амьдарч сурсан. Гэтэл энэ наадмыг үзэх гэж манай жижиг оронд олон хүн ирнэ. Эрх баригчид энэ тэмцээнийг зохион байгуулах гэж дэндүү улайрч байгаа нь энгийн иргэдэд төвөг, дараатай байна” гэж Мариам Даруж гэдэг сэтгүүлч бичжээ. 

Энэ үг бусдад ойлгомжгүй сонсогдож мэднэ. Гэхдээ дээр дурдсан Катар дахь Америкийн их сургуулийн нийгэм судлаачийн хэлснээр катарчууд өмнө нь ойлгож мэддэг байсан бүхнээ, өөрсдөд нь хамаатай хэмээн үнэлж ирсэн болгоноо 20-иодхон жилийн дотор алдсан болохоор дэлхий нийтийн анхаарал тэдэнд хүнд тусаж байгаа нь аргагүй юм.


8.8

/10
Үнэлгээ өгөх

Холбоотой мэдээ



Сэтгэгдэл (3)


АНХААРУУЛГА: Уншигчдын бичсэн сэтгэгдэлд ARAV.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.


Манайхыг бодвол удирдагчид нь хоншоортой юм. Ард түмнээ баян амьдруулж байш дээ.
tenegyyd iim amidaralaar uaxii
+2
Ёстой л аз жаргалаа алтаар сольждээ
Quiz game - Start
100 Секунд 7 хоногийн шилдэг
Дашдэмбэрэл
01Дашдэмбэрэл Азжаргал
109,300 оноо
Г.
02Г. Орхоо
20,000 оноо
таны овог,
03таны овог, нэр
оноо
таны овог,
04таны овог, нэр
оноо
таны овог,
05таны овог, нэр
оноо
таны овог,
06таны овог, нэр
оноо
таны овог,
07таны овог, нэр
оноо
таны овог,
08таны овог, нэр
оноо
таны овог,
09таны овог, нэр
оноо
таны овог,
10таны овог, нэр
оноо
Үгийн сүлжээ - Start
Үгийн сүлжээний ялагчид
Emch
01Emch Li Yafei
21 минут 50 секунд
Ганхуяг
02Ганхуяг Ариунтуяа
27 минут 22 секунд
Ган-Эрдэнэ
03Ган-Эрдэнэ Сугаржавын
30 минут 17 секунд
Mujaan
04Mujaan Mujaan
31 минут 22 секунд
Ganaa
05Ganaa GT
38 минут 22 секунд
Ц.
06Ц. Энхжаргал
40 минут 49 секунд
Дэмбээ
07Дэмбээ Чонод
43 минут 41 секунд
Дашдэмбэрэл
08Дашдэмбэрэл Азжаргал
48 минут 1 секунд
Дүүгээ
09Дүүгээ Дүүгээ
48 минут 56 секунд
Battsengel
10Battsengel BL
1 цаг 2 минут 25 секунд