Арав.мн

Хүний нэрээр нэрлэгдсэн орнууд

Хүний нэрээр нэрлэгдсэн орнууд

Америго Веспучи, Ричард Америк хоёрын нэгнийх нь нэрээр нэрлэгдсэн гэх Америк тив болон АНУ, Кристофер Колумбын нэрээр нэрлэгдсэн Колумб улс, Аврагч хэмээгдэх Есүс Христийн алдрыг хүртсэн Эль Сальвадор, домгийн баатар Ромулын нэртэй Ром хот, Европа охин тэнгэрийн нэрээр нэрлэгдсэн Европ тив гээд хүний нэртэй газар орон дэлхийн өнцөг булан бүрт бий. Алтан ордны хаан Өзбегийн нэрээр Узбек улс нэрлэгдсэн байх магадлал өндөр. Ямартай ч цахим нэвтэрхий тольд тэмдэглэснээр эдүгээ дэлхий дээр түүхэн бодит хүний алдар нэр болон хэн нэг эрхмийн цол гуншингаар нэрлэгдсэн туурга тусгаар 26 улс байна. Тэднээс 10-ыг нь дор онцоллоо. 


10

Сан Марино

Дэлхийн хамгийн жижиг орнуудын нэг, түүхэн дэх хамгийн эртний бүгд найрамдах улс гэгддэг Сан Марино Марин хэмээх гэгээнтний нэрээр нэрлэгджээ. Домогт өгүүлснээр тэрбээр Далмацийн чулуучин байсан бөгөөд Ромоос цөлөгдөн оргож босон явахдаа нийтийн тооллын 301 онд өнөөгийн Сан Мариногийн нутагт нэгэн бяцхан сүм барьсан байна. Тэрхүү сүмийн хуврагууд болон сүсэгтэн олон анхны сан мариночууд болжээ. 


09

Кирибати

1979 онд Их Британиас тусгаар тогтносон, 33 шүрэн арлаас бүрдэх, Номхон далай дахь энэ улс Британийн ахмад Томас Гилбертийн нэрийг хүртжээ. Нутгийн уугуул иргэд Гилберт гэх нэрийг өөрсдийн хэл аялгадаа тааруулсан нь Кирибати болсон байна. 


08

Свазиланд

Мсвази III хаан

Мозамбик болон ӨАБНУ-ын дунд орших энэ улс түүхэн дэх хамгийн аугаа хааныхаа нэр алдрыг хүртжээ. 1840-1868 онд төр барьсан хоёрдугаар Мсвази хаан дотоодын овог аймгуудаа нэгтгэн, улс орныхоо газар нутгийг хоёр дахин тэлсэн, хаант засгийг орчин үежүүлж, нэр хүндийг нь өргөсөн хэмээн ард олныхоо хайр хүндлэлийг хүлээсэн нэгэн байв. Ард түмэн нь түүнийг бүр амьд ахуйд өөрсдийгөө Мсвазийн хүмүүс буюу свазичууд хэмээн нэрлэх болжээ. 


07

Маршаллын арлууд

1979 онд АНУ-аас тусгаар тогтносон, 1200 арлаас бүрдэх энэхүү жижигхэн улс газар орныг нь анхлан өрнө дахинд нээж өгсөн Британийн тэнгисийн хүчний ахмад Жон Маршаллын нэрээр нэрлэгджээ. Тэрбээр Англиас хоригдол тээсэн хөлөг онгоц залан Австрали хүрэх замдаа 1788 онд дээрх бүлэг арлуудыг нээсэн байна. 


06

Маврикий

Энэтхэгийн далайд орших уг арал дээр голланд далайчид тэртээ XVI зуунд анх суурьшсан байдаг. Тэд шинэхэн эзэмшлээ Оранжийн хунтайж Морисын нэрээр нэрлэсэн нь хожим англи, франц дуудлагаар өөрчлөгдөн Моришис буюу Морисын арлууд, Маврик, Маврисий зэрэг олон янзаар хэлэгдэх болжээ. 1715 онд Нидерландын колоничлогчдоос Францын Зүүн Энэтхэгийн компанийн мэдэлд шилжсэн Маврикийн арлууд 1810 онд Британийн эрхшээлд орж, 1968 онд тусгаар тогтносон байна. 



05

Сейшелийн арлууд

Аугаа аялагчдын нэг Васко да Гама эргэн тойрныхоо бусад жижиг арлын хамт Адмиралын арлууд гэгддэг Сейшелийн арлуудыг дэлхийн газрын зураг дээр тэмдэглэсэн анхны хүн юм. Харин Францын тэнгисийн хүчний ахмад Корнейл Морфи 1756 онд тус бүс нутагт хүрч, нууцлаг арлуудыг Францын хааны эзэмшил хэмээн зарласан байна. Тэрбээр Адмиралын арлуудын доторх гол 100-гаад арлыг тухайн үеийн Францын Сангийн сайд Жан Моро де Сейшелийн нэрээр нэрлэжээ. Гэвч Сейшелийн арлууд Францын мэдэлд удсангүй, 1810 онд Британийн эрхэнд орж, 1976 онд тусгаар тогтносон түүхтэй. 


04

Болив

Өмнөд Америкийн төвд орших энэ улс тус бүс нутгийг Испанийн ноёрхлоос аврахын тулд 16 жил тэмцсэн их хувьсгалч, Чөлөөлөгч хэмээгдэх Симон Боливарын нэрээр нэрлэгджээ. Түүний ачаар Венесуэл, Колумб, Эквадор, Перу, Панам зэрэг улс Испаниас өрх тусгаарласан ч зөвхөн Болив улс л Чөлөөлөгчийнхөө нэрийг хүртсэн байна. Симон Боливар тус улсын тусгаар тогтнолын төлөөх дайн 1825 онд эцэс болоход анхны Үндсэн хуулийг нь бичилцэхэд хүртэл гар бие оролцсон байдаг.


03

Саудын Араб

Саудын Арабын хаант улс хэдэн үеэрээ төр барьж буй ихэс дээдсийнхээ овгийн нэрээр нэрлэгджээ. Аль-Сауд овогтон дотроос тодорсон Абдулазиз бин Абдулрахман аль-Файсаль аль-Сауд нь орчин цагийн Саудын Араб орныг 1932 онд үндэслэн байгуулсан түүхтэй. Тэрбээр Арабын хойгийн хүчирхэг овог аймгуудыг нэгтгэн нэгдмэл нэг улс болгохыг зорьсон нь ийнхүү биеллээ олжээ. Эдүгээ аль-Саудын гэр бүл 25 мянган гишүүнтэй гэх бөгөөд 200 нь хууль ёсны хунтайж, ханхүү нар гэгддэг. 


02

Филиппин

Зүүн өмнөд Ази дахь энэ улс 1556-1598 онд төр барьсан Испанийн хаан II Филипийн нэрийг хүртжээ. Испанийн хаан анхдугаар Карлосын зарлигаар дэлхийг тойрон аялсан Фердинанд Магеллан тус улсын эрэг хөвөөнд 1521 онд хүрч, газар нутгийг нь Испанийн хааны эзэмшлээр зарласан байна. Хожим Испанийн аялагч Руй Лопес де Вильялобос мөнөөх арлуудыг хоёрдугаар Карлос хааны хүү, ирээдүйн II Филип хааны нэрээр нэрлэжээ. Хэдэн зууны дараа Британийн эзэнт гүрнийг тодорхойлох болсон “Нар жаргадаггүй эзэнт гүрэн” хэмээх хэлц угтаа Филипийн үед үүссэн бөгөөд чухам түүний эзэмшил нутгийг, тэр дундаа Филиппиний арлуудыг хэлсэн хэрэг байлаа.


01

Сент Люсия

Карибын тэнгисийн зүүн хэсэгт орших энэхүү бяцхан арлын орон эмэгтэй хүний нэрээр нэрлэгдсэн дэлхийн цорын ганц тусгаар улс юм. Сиракузийн Люсия хэмээх эмэгтэй нийтийн тооллын 283-304 онд амьдарч байсан бодит хүн бөгөөд Ромын эзэн хаан Диоклетианы христийн шашинтнуудыг хоморголон хядах харгис үйлдлийн хохирогч болж, итгэл үнэмшлийнхээ төлөө амиа өргөсөн, хожим Ромын католик сүмээс ариун гэгдсэн гэгээнтэн ажээ. Одоогийн Сент Люсиягийн нутагт 1550-иад оны сүүлчээр хүрсэн анхны европчууд болох Францын далайчид Гэгээн Люсиягийн өдөр буюу арванхоёрдугаар сарын 13-нд тус арал дээр хөл тавьсан тул арлыг түүний нэрээр нэрлэсэн гэдэг.



9.9

/10
Үнэлгээ өгөх

Холбоотой мэдээ



Сэтгэгдэл (0)


АНХААРУУЛГА: Уншигчдын бичсэн сэтгэгдэлд ARAV.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.


Сэтгэгдэл бичигдээгүй байна

Quiz game - Start
100 Секунд 7 хоногийн шилдэг
Otto
01Otto Hiko
800 оноо
таны овог,
02таны овог, нэр
оноо
таны овог,
03таны овог, нэр
оноо
таны овог,
04таны овог, нэр
оноо
таны овог,
05таны овог, нэр
оноо
таны овог,
06таны овог, нэр
оноо
таны овог,
07таны овог, нэр
оноо
таны овог,
08таны овог, нэр
оноо
таны овог,
09таны овог, нэр
оноо
таны овог,
10таны овог, нэр
оноо
Үгийн сүлжээ - Start
Үгийн сүлжээний ялагчид
Emch
01Emch Li Yafei
21 минут 50 секунд
Ганхуяг
02Ганхуяг Ариунтуяа
27 минут 22 секунд
Ган-Эрдэнэ
03Ган-Эрдэнэ Сугаржавын
30 минут 17 секунд
Mujaan
04Mujaan Mujaan
31 минут 22 секунд
Ganaa
05Ganaa GT
38 минут 22 секунд
Ц.
06Ц. Энхжаргал
40 минут 49 секунд
Дэмбээ
07Дэмбээ Чонод
43 минут 41 секунд
Дашдэмбэрэл
08Дашдэмбэрэл Азжаргал
48 минут 1 секунд
Дүүгээ
09Дүүгээ Дүүгээ
48 минут 56 секунд
Battsengel
10Battsengel BL
1 цаг 2 минут 25 секунд